அரிதினும் அரிதுகேள் 28 எங்கெங்கு நீ அங்கங்கு நான்.....

கண்ணெல்லாம் உன் வண்ணம்.....

சிவகுமார் நடித்த சில படங்களின் பாடல்கள் மிகச்சிறப்பானவை. சீர் வரிசை படத்தில் கண்ணனை நினைக்காத நாளில்லையே பாட்டும், உறவு சொல்ல ஒருவனில் கேளு பாப்பா ஆசையின் கதையை பாட்டும் சாய்ந்தாடம்மா சாய்ந்தாடு படத்தில் ஒரு காதல் தேவதை பாட்டும் இனிமையானவை. பத்ரகாளி,சிட்டுக்குருவி, கவிக்குயில், அன்னக்கிளி  பாடல்களும் பட்டி தொட்டியெல்லாம் பிரபலமானவை
இதில் சில படங்கள் இப்போது கிடைப்பதில்லை. இதன் பாடல்களும் மறைந்து விட்டன. ஆனால் சில பாடல்களை எப்போதாவது எங்கேயாவது கண்டுபிடிக்க நேரும் போது பரவசம் ஏற்படுகிறது. பொதுவாக யூடியூப்பிலும் இணையவெளியிலும் படங்களையும் பாடல்களையும் தேடுபவனல்ல நான். படைப்பாளியின் உரிமம் பெறாமல் பதிவேற்றம் செய்வதில் உடன்பாடு இல்லை. எனவேதான் இந்தப் பகுதியிலும் பாடல்களின் யூடியூப் இணைப்பை நான் வெளியிடுவதில்லை. கிடைக்காத பாடலை கண்டுபிடிக்க யூடியூப் மிகப்பெரிய உதவி என்பதையும் நான் மறுக்கவில்லை. திருட்டு சிடியை கொள்கையளவில் எதிர்க்கும் போதும் பல உலகத் திரைப்படங்களை வேறு எப்படி பார்க்க முடியும் என்று தெரியவில்லை.
ஒண்ணே ஒண்ணு கண்ணே கண்ணு படத்தில் இடம் பெற்ற  இந்தப் பாடலும் கண்மணி ராஜா படத்தில் இடம் பெற்ற காதல் விளையாட கட்டிலிடு கண்ணே பாடலும் எனக்குப் பிடித்தமானவை. வி.குமார் இசையமைத்த பாடல் இது. மெல்லிசை மன்னரின் சாயலில் பாடல்களை அமைத்தவர் குமார். அதனால் விகுமாரின் பல பாடல்களை ரசிகர்கள் மெல்லிசை மன்னரின் பாடல்களாக பட்டியலில் சேர்த்துவிடுகின்றனர். இருகோடுகள், வெள்ளிவிழா, நூற்றுக்கு நூறு போன்ற படங்களில் எல்லாம் ஒலித்தவை வி.குமாரின் பாடல்கள்தான். காதோடுதான் நான் பாடுவேன், நான் உன்னை வாழ்த்தி பாடுகிறேன் நீ வரவேண்டும், உனக்கென்ன குறைச்சல் நீ ஒரு ராஜா , போன்ற குமாரின் பொன்னான பாடல்கள் வரிசையில் இந்தப்பாடலையும் இணைக்கலாம்.





படம் ஒன்னே ஒன்னு கண்ணே கண்ணு
பாடலாசிரியர் கண்ணதாசன்
பாடியவர்கள் ஸ்வர்ணா ,எஸ்.பி.பாலசுப்ரமணியம்
இசை வி.குமார்
நடித்தவர்கள் சிவகுமார் ஜெயசித்ரா

 கண்ணெல்லாம் உன் வண்ணம்
நெஞ்செல்லாம் உன் எண்ணம்
கண்ணே செம்பொன்னே நீ
வா...வா வா...வா வா...வா

எங்கெங்கு நீ அங்கங்கு நான்
நீயின்றி நானில்லை கண்ணா
நீயின்றி நானில்லை கண்ணா

மாந்தளிர் உடல் தளதளவென
மாதுளம் கனி பளபளவென
நான் தொடவரும் வடிவழகென வா வா
பூங்கொடி இடை தொடு தொடுவென
பூவிதழ் சுவை கொடு கொடுவென
நீ தரும் சுகம் பொழுதொரு விதம் தா தா

ஆ...நீயொரு பாதி தந்தால்
நானும் ஓர் பாதி உண்டு
நீயொரு பாதி தந்தால்
நானும் ஓர் பாதி உண்டு
தந்ததோ நூறு என்றால்
என் பங்கும் நூறு உண்டு

கண்ணெல்லாம் உன் வண்ணம்
நெஞ்செல்லாம் உன் எண்ணம்
கண்ணே செம்பொன்னே நீ வா வா

எங்கெங்கு நீ அங்கங்கு நான்
நீயின்றி நானில்லை கண்ணா
நீயின்றி நானில்லை கண்ணா

சேய் பிறந்தது புது நிலவென
வாய் திறந்தது பனி மலரென
நாம் விரும்பிய வரம் கிடைத்தது கண்ணே
தேன் மழலையின் குறுநகையொரு
பூங்கவிதையின் மணிமுடியென
தாய் மனம் அதில் தனை மறந்தது கண்ணா

ஆ...தென்றலே நீ வளர்க
தெய்வங்கள் வாழ்த்துரைக்க
தென்றலே நீ வளர்க
தெய்வங்கள் வாழ்த்துரைக்க
தந்தை போல் பேர் விளங்க
தாய் உள்ளம் தான் மயங்க

கண்ணெல்லாம் உன் வண்ணம்
நெஞ்செல்லாம் உன் எண்ணம்
கண்ணே செம்பொன்னே நீ வா வா

இந்தப் படத்தில் மற்றொரு இனிமையான பாடலும் இடம் பெற்றுள்ளது .இந்தப் பாட்டிலும் எஸ்.பி.பியின் குரல் கொஞ்சுகிறது. கூடவே பி.சுசிலாவின் குரல் சந்தனத்துடன் குங்குமம் போல் சேர்ந்து மணக்கிறது. விகுமாரின் பாடல்கள் எம்.எஸ்.விஸ்வநாதனின் பாடல்கள்  போல கருதப்படுவது போலவே வாலியின் பாடல்கள் கண்ணதாசன் பாடல்கள் போல கருதப்படுவதுண்டு. ஆனால் இந்த பாடல்கள் வாலியா கண்ணதாசனா என்ற குழப்பம் எனக்கும் உண்டு. படத்தின் டைட்டிலைப் பார்த்தால் கண்டுபிடிக்கலாம் என்றாலும் இரண்டு பேரும் பாட்டு எழுதிய படங்களில் சிக்கல் நீடிக்கிறது. ஆயினும் சில இணைய தளங்களில் தேடிப் பார்த்து இந்த இரண்டு பாடல்களும் கண்ணதாசன் எழுதியவைதான் என்று நான் முடிவுக்கு வந்தேன். யாராவது தவறு என சுட்டிக்கட்டினால் திருத்திக் கொள்வேன்.


பால் மணம் பூ மணம் பாவை மணம்
பால் மணம் பூ மணம் பாவை மணம்
கண்ணா உனக்கிது பிருந்தாவனம்
கண்ணா உனக்கிது பிருந்தாவனம்
கோதையின் பூவுடல் கோகுலம்
என்றே கண்ணன் விளையாட
காலம் என்ன நேரம் என்ன
கண்ணே கொஞ்ச வா (பால் மணம்) 


வாடைதான் பட்டாடை இழுக்கும்
செவ்வாழை பூ என் கண்ணை பறிக்கும்...
கிள்ளி கிள்ளி பறிக்கின்ற கைகள் என்னவோ
கண் பட்டு கைத் தொட்டு கண்ணிப் போகாதோ..



பூ முத்தம் வேண்டும் கன்னம்
புண்படும் என்றா எண்ணும்...
எல்லாம் இன்று தந்தால்
நாளை மிச்சம் வேண்டுமே... (பால் மணம்) 


கால் முதல் என் கூந்தல் வரையில்
உன் காவியம் சொல் பள்ளியறையில்...
சொல்லிச் சொல்லி முடியாது பள்ளிக் கவிதை
அம்மம்மா கேட்டுப் பார் அந்திப் பொழுதை...
ஆனந்த ராகம் ஒன்று..ஆரம்பம் ஆகும் அன்று..
ராகம் பாதி தாளம் பாதி சேர்ந்தால் கீதமே (பால் மணம்)

அரிதினும் அரிது கேள் -27 எல்லோரும் நலம்வாழ நான் பாடுவேன்

காதல் தோல்வி பாடல்களில் என் உள்ளம் கவர்ந்த பாடல்களில் இது ஒன்று. இந்தியில் பிரம்மச்சாரி என்ற படத்தின் தமிழாக்கமான எங்க மாமா- வில் இடம் பெற்ற பாடல் இது. இந்தியில் ஷம்மி கபூர் கதாநாயகன் ராஜஸ்ரீ கதாநாயகி. இந்த ராஜஸ்ரீ தமிழில் குடியிருந்த கோவில், காதலிக்க நேரமில்லை போன்ற படங்களில் நடித்த நடிகை ராஜஸ்ரீ அல்ல.இவர் இந்தி நடிகை. ராஜ்கபூரின் அரவுண்ட் தி வர்ல்ட் இன் 80 டேஸ், சாந்தாராமின் கீத் காயா பத்தரோன்மே போன்ற படங்களில் நடித்தவர்.மிக அழகான கண்கள் உடையவர். கொண்டையும் ஸ்லீவ் லெஸ் ரவிக்கையுமாக அந்தக்கால இந்தி நடிகைகளின் சாயலில் இருந்தபோதும் மிகவும் மனம் கவர்ந்த நடிகையாக இருந்தார். பிரம்மச்சாரி படம் அனாதை குழந்தைகளுக்காகவே வாழும் ஒருவர் தனது காதலியை துறக்க துணியும் போது இந்தப் பாடல் இடம் பெறும். இந்தியில் இசை சங்கர்- ஜெய்கிஷண். பாடியவர் முகமது ரபி. பாடலாசிரியர் ஹஸ்ரத் ஜெய்பூரி. 
இப்பாடலில் பியானோ இசை ஒரு அற்புதம். அந்தக்கால இந்திப்படங்களி்ல் பியானோ இசை இல்லாத படமே இல்லை. ஆனால் இந்தப் பாடலுக்காக போடப்பட்ட செட்டும், நடன நடிகர்களும் வித்தியாசமான கேமரா கோணங்களும் ஷம்மி கபூரின் இளமையான நடிப்பும் ராஜஸ்ரீயின் கண்ணீர் சிந்தும் விழிகளும் பாடலுக்கு முன்பு ஒலித்த நீண்ட பிஜிஎம் ஆர்க்கெஸ்ட்ராவும் பாடலை மறக்க முடியாத பாடலாக்கி விட்டன. தில் கே ஜரோக்கோன்சே என்ற அந்தப் பாடலின் தமிழ் வடிவம்தான் எங்க மாமாவில் இடம் பெற்ற இ்ந்தப் பாடல்




படம் எங்க மாமா
பாடலாசிரியர் கண்ணதாசன் இசை எம்.எஸ்.விஸ்வநாதன்
பாடியவர் டி.எம்.எஸ். நடிப்பு சிவாஜி கணேசன் ஜெயலலிதா 

எல்லோரும் நலம் வாழ நான் பாடுவேன்
நான் வாழ யார் பாடுவார்
என் பாடல் நான் பாட பலர் ஆடுவார் இனி
என்னோடு யார் ஆடுவார்.

பூப்போன்ற என் உள்ளம் யார் கண்டது-அது
பொல்லாத மனம் என்று பேர் வந்தது
வழியில்லாத ஏழை எது சொன்னாலும் பாவம் -என்
நெஞ்சும் என்னோடு பகையானது

கண்ணீரை நான் எங்கு கடன் வாங்குவேன்-அது
கடனாக வந்தாலும் தடை போடுவேன்
நியாயங்கள் தெளிவாக நாளாகலாம்- நான் 
யார் என்று அப்போது நீ காணலாம்

உன் பார்வை என் நெஞ்சில் விழுகின்றது
உன் உள்ளம் எதுவென்று தெரிகின்றது
நான் இப்போது ஊமை மொழியில்லாத பிள்ளை 
என்றேனும் ஓர்நாளில் நான் பேசலாம்
உன் பாதை நீ கண்டு நீ வாழலாம் - இனி
என்பாதை நான் கண்டு நான் போகலாம்
எங்கே நீ சென்றாலும் நலம் வாழலாம் 
நான் எப்போதும் நீ வாழ இசை பாடலாம்


ஷம்மிகபூரி்ன் நடிப்பை விழுங்கி விட்டார் சிவாஜி கணேசன். கண்கள் சிவக்க, கோபமும் ஆற்றாமையும் இயலாமையும் நிறைந்த துயரமான முகத்தை நடிகர் திலகம் கொட்டித் தீர்த்தார். ராஜஸ்ரீயைப் போல் நாசூக்காக அழத்தெரியாமல் ஜெயலலிதா தமிழ் நடிகைகளைப் போல் குமுறி குமுறி அழுதார். கண்ணதாசனின் ஆழமான வரிகளுக்கு இந்தியிலிருந்து வழுவாமல் தனது ஒரிஜினாலிட்டியை இழக்காமல் மெல்லிசை மன்னர் இசையமைத்திருந்தார். இந்தப் படத்தில் நான் தன்னந்தனி காட்டு ராஜா, சொர்க்கம் பக்கத்தில், செல்லக்கிளிகளாம் பள்ளியிலே செவ்வந்திப்பூக்களாம் தொட்டிலிலே போன்ற இனிமையான பாடல்கள் இடம் பெற்றிருந்தன.
எங்க மாமா படம் இப்போது மாடர்ன்சினிமா நிறுவனத்தால் டிவிடியாக நல்ல பிரிண்டில் கிடைக்கிறது. 40 ரூபாய்தான் விலை. பாடல்களுக்காகவாவது வாங்கி வைத்துக் கொள்ளுங்கள்.

அரிதினும் அரிது கேள் 26 நான் வெண்மேகமாக விடிவெள்ளியாக வானத்தில் பொறந்திருப்பேன்....

படம் எங்க ஊர் ராசாத்தி
நடிகர்கள் சுதாகர் , ராதிகா
பாடல் - முத்துலிங்கம்> இசை -கங்கை அமரன்
படத்தை இயக்கியவர் N.S.ராஜேந்திரன்.
பாடியவர்கள்- மலேசியா வாசுதேவன், எஸ்.பி.சைலஜா




80 களின் தொடக்கத்தில் புற்றீசல் போல் லோ பட்ஜெட் படங்கள் வெளியாகின. பாரதிராஜாவின் 16 வயதினிலே, கிழக்கே போகும் ரயில் போன்ற படங்களின் தாக்கத்தால் காதல் கதைகளுக்கு கூடுதலான கவனம் கிடைத்தது. சுதாகா் என்ற நடிகர் லோ பட்ஜெட் ஹீரோவாக படங்களில் புக் ஆனார். பொண்ணு ஊருக்குப் புதுசு, நிறம் மாறாத பூக்கள், எங்க ஊரு ராசாத்தி போன்ற படங்களில் சுதாகர் ஜொலித்தார். பின்னர் தெலுங்குப் படங்களில் காமெடி கலந்த வில்லன் பாத்திரங்களில் நடித்து காணாமல் போனார். ராதிகாவுடன் அவர் ஜோடி சேர்ந்த படம் கிழக்கே போகும் ரயில் ,இதைத் தொடர்ந்து மேலும் சில படங்களில் இந்த ஜோடி இணைந்தது. இதில் ஒன்றுதான் எங்க ஊரு ராசாத்தி. கங்கை அமரன் இளையராஜா கிடைக்காத தயாரிப்பாளர்களுக்காக இசையமைக்கலானார். அவர் இசையமைத்த இந்தப் படத்தில் முத்துலிங்கம் எழுதிய காதல் தோல்வி பாடல் இது. இந்தப் பாடல் எனது பதின் பருவத்தில் இனம் புரியாத துயரத்தையும் ஆற்றாமையையும் ஏற்படுத்தியிருக்கிறது. காதலர்கள் பிரிந்த பின்னர் விடிவெள்ளியாகவும் வெண்மேகமாகவும் மறுஜென்மத்தில் பிறந்து வந்து இணையும் ஆசை இப்பாடலில் தொனிக்கிறது. இப்போது கேட்டாலும் இனிமையான காதல் பாடல்களில் இந்தப் பாடலும் ஒன்று என்ற எண்ணம் மாறவே இல்லை.


ஆண்      :  பொன்மானை தேடி நானும் பூவோடு வந்தேன்
                  நான் வந்த நேரம் அந்த மான் அங்கே இல்லை
                  அந்த மான் போன மாயமென்ன என் ராசாத்தி...
                  அடி நீ சொன்ன பேச்சு நீர் மேலே போட்ட மாக்கோலமாச்சுதடி
                  அடி நான் சொன்ன பாட்டு ஆத்தோரம் வீசும் காத்தோட போச்சுதடி

                        (இசை)                          சரணம் - 1

பெண்      :  மானோ தவிச்சு வாடுது மனசுல நினைச்சு வாடுது
                  எனக்கோ ஆசை இருக்குது ஆனா நிலைமை தடுக்குது
                  உன்னை மறக்க முடியுமா உயிர வெறுக்க முடியுமா
                  ராசாவே...காற்றில் ஆடும் தீபம் போல
                  துடிக்கும் மனச அறிவாயோ

ஆண்      :  பொன்மானை தேடி நானும் பூவோடு வந்தேன்
                  நான் வந்த நேரம் அந்த மான் அங்கு இல்லை (இசை)

பெண்      :  ஆரிராராரோ... ஆரி ராராரோ...
                   ஆரிராராரோ... ஆரிராராரோ... ஆராரோ...ஆராரோ

                        (இசை)                          சரணம் - 2

ஆண்      :  எனக்கும் உன்னை புரியுது உள்ளம் நல்லா தெரியுது
                  அன்பு நம்ம சேர்த்தது ஆசை நம்ம பிரிச்சது
                  ஒன்னை மறக்க முடியல உயிர வெறுக்க முடியல
                  ராசாத்தி... நீயும் நானும் ஒன்னா சேரும்
                  காலம் இனிமே வாராதோ

பெண்    :   இன்னோரு ஜென்மம் இருந்தா
                  அப்போது பொறப்போம் ஒன்னோடு ஒன்னா
                  கலந்து அன்போட இருப்போம்
                  அது கண்டாலம் போச்சுதுன்னா
                  என் ராசாவே...
                  நான் வெண்மேகமாக விடிவெள்ளியாக
                  வானத்தில் பொறந்திருப்பேன்
                  என்னை அடையாளம் கண்டு
                  நீ தேடி வந்தா அப்போது நான் சிரிப்பேன்

ஆண்      :  பொன்மானை தேடி நானும் பூவோடு வந்தேன்
                  நான் வந்த நேரம் அந்த மான் அங்கு இல்லை


இதே போன்ற சில பாடல்களுக்கு சங்கர் கணேஷ் இசையமைத்துள்ளனர். நெஞ்சிலே துணிவிருந்தால் படத்தில் எஸ்.பி.பாலசுப்ரமணியம் பாடியுள்ள பாடலில் ஊரை விட்டு வந்தாலும் உன் நினைப்பு மாறலியே என்ற வரிகள் மனத்தில் அழுத்தமாக பதிந்துவிட்டன. கரை கடந்த ஒருத்தியில் ஓடத்திலே தண்ணீரு என்ற எஸ்.ஜானகியின் பாடலும் புதிய தோரணங்கள் படத்தில்  ஓடக்கரை மண்ணெடுத்து உன் உருவம் செஞ்சு வச்சேன் என்ற பாடலும் மறக்கமுடியாத பாடல்களில் இடம் பெற்றுள்ளன. படுத்தா பலநினைவு, பாயெல்லாம் கண்ணீரு எடுத்துச் சொல்ல யார் இருக்காங்க என்ற வரி இன்றும் காதலின் வேதனையை ஒரு முள்ளைப் போல் மனதுக்குள் தைக்கிறது.

தந்தை காலமானார்

எனது அருமை மிகு தந்தையார் கூப்சந்த் மார்ச் 4ம் தேதி பிற்பகல் 2.10 மணிக்கு  காலமானார். அவருக்கு வயது 83. அவருடைய பெயரை உச்சரிக்கும் போது பலரது கேலிக்கும் வியப்புக்கும் ஆளாகியிருக்கிறேன். ரேசன் கார்டு, தேர்தல் வாக்காளர் அடையாள அட்டை. பான்கார்டு, என அனைத்தி்லும் தப்புத்தப்பாகத்தான் அவர் பெயரை குறிப்பிடுவார்கள்.
எனது தந்தையின் அப்பா பெயர் சீத்தல்தாஸ். பாகிஸ்தானின் பிரிவினைக்கு முந்தைய சிந்து நதிக்கரையில் பிறந்தவர். சிந்தி இனத்தவர். குருநானக்கின் தீவிர பக்தர். துறவி போல் வாழ்ந்தவர், ஆயினும் வள்ளுவர் வழியில் இல்லறத்தை நல்லறமாக நாடியவர்.3 வயதில் மஞ்சள்காமாலையால் நான் இறக்கும் நிலையில் இருந்த போது மறுபிறவி எடுப்பேன் என அவர் கூறினாராம். அதை நிரூபிக்கும் வகையில் உயிர் பிழைத்த நான் பேசுவதும் தவழ்வதும் மீண்டும் புதிதாக நடந்ததாக எங்கள் குடும்பத்தில் பேசுவார்கள். எனக்கு கலையின் மீதும் அறிவின் மீதும் தாகம் எழுந்ததற்கு அவர் போட்ட விதையும் இந்த மறுபிறவியும் ஒரு காரணமாக இருக்கலாம்.

பிரிவினையின் போது ரயிலில் சீக்கியர்கள் பாகிஸ்தான் முஸ்லீம்களால் கோரமாக கொலை செய்யப்பட்ட காலத்தில் ரயிலின் கூரை மீது ஏறி உயிர்தப்பி இந்தியாவில்- திருச்சியில் அகதியாக தமது குடும்பத்துடன் வந்தவர் சீத்தல்தாஸ். அவரது தோளைத் தொற்றி சிறு பிள்ளையாக வந்தவர் எனது தந்தை. பாகிஸ்தானில் அவர்கள் விட்டு வந்த சொத்துகள் இன்று பல  கோடிகளை தாண்டும். திருச்சியில் உப்பு வியாபாரம் செய்தார்கள். பின்னர் துணி வியாபாரம். அப்பா கணக்கு எழுத ஆரம்பித்து  6 பிள்ளைகளை வளர்த்தார்.
அப்பாவிடமிருந்து நான் பெற்ற சொத்து இந்தி சினிமா பாடல்கள். முகமது ரபி, முகேஷ், மன்னாடே, லதா மங்கேஷ்ர்,மகேந்திர கபூர், கிஷோர் குமார் பாடல்களை அப்பா விரும்பிக் கேட்பார். அநத பழக்கம் எனக்கும் தொற்றிக் கொண்டது. ஏக்ஃபூல் தோ மாலி படத்தில் மன்னாடே பாடிய துஜே சூரஜ் கஹூ யா சந்தா என்ற பாடல் இதில் மறக்க முடியாதது. அந்தப் பாட்டில் நான் இறந்த பின்னும் உன் ரூபத்தில் நான் வாழ்வேன் என்று ஒரு தந்தை மகனுக்குக் கூறுவார். இந்தப் பாடலை எனக்காக அப்பா பாடுவதைக் கேட்டிருக்கிறேன். இப்போது இந்த பாடலை நானும் விக்கிக்காக பாடி வருகிறேன், விக்கிக்கும் இந்தப் பா்டல் மிகவும் பிடித்தது. என் செ்ல்போனின் ரிங்டோனும் இந்தப்பாட்டுத்தான்.

அப்பாவைப் பற்றி தனி புத்தகமே எழுதலாம்.

இலங்கையில் தமிழர்கள் படுகொலை செய்யப்பட்டு அகதிகளாக புகலிடம் தேடி வந்தவர்களைப் பற்றி நாம் பலமுறை பேசுகிறோம். ஆனால் எங்களைப் போன்ற பரிதாபத்துக்குரியவர்கள் பற்றி என்னைப் போன்ற ஓரிருவர்தான் பதிவு செய்ய முடியும். கிடங்குத்தெரு நாவலில் அதை ஓரளவுக்கு செய்தேன்.

அப்பாவுக்கு சிறுவயது முதலே ஹின்டு இதழ் படிப்பது வழக்கம். எனக்கும் இன்று வரை அந்தப் பழக்கம் இருக்கிறது. அந்த பத்திரிகையிலேயே அவருக்கு இரங்கல் செய்தி வெளியிட்டோம்.

அவரை கொண்டு போய் மயான சிதையில் வைத்து கொள்ளி வைத்த போது அழுகை பீறிட்டது. நெருப்பே எனது தந்தையை சுடாமல் வெண்சாமரம் வீசு என்று கதறிக் கொண்டே வந்தேன். இறந்த பின்னர் உடல் உணர்ச்சியற்றுப் போனாலும் உள்ளம் அதை ஒப்புக் கொள்ள மறுக்கிறது. நாம் எரிப்பது சதைப்பிண்டத்தையல்ல ரத்தமும் சதையுமாக நம்முடன் கலந்து விட்ட ஒரு உயிரோவியத்தை.
அப்பா இப்போது எங்கே இருப்பாரோ?

சர்வதேச திரைப்பட விழா 2

குமுதம் தீராநதி மார்ச் 2016 இதழில் வெளியானது .

சர்வதேச திரைப்பட விழா கட்டுரையின் தொடர்ச்சியாக.....



லென்ஸ்
தமிழ்-மலையாளம்-ஆங்கிலம் என மும்மொழிப்படமாக எடுக்கப்பட்ட இப்படம் இணையத்தில் பதிவேற்றப்படும் அந்தரங்கமான காட்சிகளைப் பார்ப்பவர்களை கூனிக்குறுகச் செய்கிறது. அடுத்தவர்களின் அந்தரங்கங்களை பார்க்கக்கூடிய வ்க்கிரம் ஒரு சமூக பழக்கமாகவே வளர்ந்துவிட்டது .நண்பனின் மனைவியே ஆனாலும் அவளது தொப்புளை செல்போனில் படம் எடுத்து இணையத்தில் பதிவிடுவது இன்றைய தலைமுறையின் அபத்தமான பாலியல் வக்கிரத்தை உணர்த்துகிறது.
அரவிந்தன் என்ற இளைஞனுக்கு சமூக ஊடகத்தில் உருவாகும் புதிய நட்பு பிரச்சினையாக உருவெடுக்கிறது. அவன் நண்பனாக அறிமுகமாகி எதிரியாக மாறும் நிக்கி என்ற யோவன் தனது தற்கொலையை லைவ் ஆக நிகழ்த்த விரும்புவதாகவும் அதை அரவிந்தன்தான் முதன்முதலாக பார்க்க வேண்டும் என்கிறான்.
யோவன் ஏன் தற்கொலை செய்ய விரும்புகிறான்?
மூணாறு பகுதியில் தனது அழகான புதுமனைவியுடன் வாழ்க்கையைத் தொடங்கும் ஒரு சாதாரண மனிதன் அவன். மனைவியின் விருப்பப்படி ஒரு வீட்டில் விளக்குகளை முழுவதும் எரிய விட்டு முதலிரவு கொண்டாடுகிறான். அந்தவீட்டில் பிளம்பர் ஒருவன் கேமராவை மறைத்து இந்த அந்தரங்க உறவை வீடியோ எடுத்து பென் டிரைவரில் போட்டு அதை தொலைத்து விட வருகிறது விபரீதம். அதை கண்டெடுக்கும் அரவிந்தன் இணையத்தில் பதிவிடுகிறான். இதனால் யோவனின் மனைவி கையை பிளேடால் வெட்டிக் கொண்டு தற்கொலை செய்துக் கொள்கிறாள். இதனால் அரவிந்தனை பழிவாங்க எண்ணி அவன் மனைவியை அவன் கண்ணெதிரே வீடியோ கான்பிரன்சிங்கில் துகிலுரிவது போல பல கொடுமைகளை செய்கிறான் யோவன். ஜூலி என்ற பெண்ணுடன் அவன் இருந்த அந்தரங்க காட்சியையும் பதிவு செய்து விடுவதாக மிரட்டுகிறான். இந்த மிரட்டல்களால் பதறும் அரவிந்தன் தனது தவறை உணர்கிறான்.இறுதியில் யோவன் துகிலுரித்தது அரவிந்தனின் மனைவியை அல்ல, கால் கேர்ளான ஜூலியைத்தான் என்கிறது கிளைமேக்ஸ். வக்கிரத்துக்கு எதிரான படமா அல்லது வக்கிரமான படமா என பல முறை யோசிக்க வைக்கிறது. சில இடங்கள் கைத்தட்டல் பெறுகின்றன. இப்படத்தை இயக்கியவர்  ஜெயபிரகாஷ். தமிழில் என்னை அறிந்தால் படத்தில் அஜித்தின் நண்பராக நடித்தவர். அவர்தான் இப்படத்தின் அரவிந்தன் பாத்திரத்தில் நடித்திருக்கிறார். யோவனாக நடித்த ஆனந்த்சாமியும் யோவனின் மனைவியாக வரும் அஸ்வதி லாலும் மனதில் நிற்கிறார்கள். அஸ்வதி லாலின் திமிறும் இளம் உடல் பல நேரங்களில் பார்வையை இன்னொரு வக்கிரத்துக்கு தூண்டுகிறது.

AN  ஜப்பான் இயக்குனர் - நவோமி காவாசி

செனடாரோ நடத்தும் சிறிய பேக்கரியில் மாணவிகள் நம்மூர் ஊத்தப்பம் போன்ற பான்கேக்குகளை சா்ப்பிட வருகிறார்கள். ஆனால் தொட்டுக் கொள்ள அவர் தரும் பீன் பேஸ்ட் ருசிப்பதே இல்லை. சென்னையில் இருக்கும் பெரும்பாலான மெஸ்களில் பொடிதோசை, ராகி தோசை ,கோதுமை தோசை ஆனியன் ஊத்தப்பம் என பிரமாதமாக தருவார்கள் ஆனால் சட்னி சாம்பார் மட்டமாக இருக்கும்.அதுபோல்தான் செனடாரோவின் கடையும். இங்கு வேலை கேட்டு 76 வயது பாட்டி ஒருத்தி வருகிறாள். அவளை விரட்டி விடும் அவர் பின்னர் அவள் தந்த பீன் பேஸ்ட்டை சாப்பிட்டு ருசியில் மெய் மயங்கி வேலைபோட்டுக் கொடுக்கிறார்.அப்புறம் அதிகாலையில் எழுந்து அந்தப் பெண்மணி பீன் பேஸ்ட் தயாரிக்கும் காட்சிகள் அபாரமான சமையல் கலையின் தன்மையை விவரிக்கின்றன. தி.ஜானகிராமனின் நளபாகத்தை நினைவுபடுத்தும் காட்சிகள் இவை. சமையல் என்பது வர்த்தகத்திற்காக செய்வது அல்ல....பசியாற்றவும் ருசியை தரவும் உள்ளத்திலிருந்து ஈடுபாட்டுடன் செய்வது அதில் நிறைய அன்பைக் கலப்பது என்கிறாள் கிழவி.
 கடையும் நல்ல பிக் அப் ஆகும் நேரத்தில் கடையின் உரிமையாளர் பெண்மணி வந்து தொழுநோயாளியாக உள்ள பெண்ணை பணியமர்துதவதா என கேட்கிறாள்.காலப்போக்கில் தோக்கு என்ற அந்த வயதான பெண்மணியும் செனடாரோவும் தங்கள் வாழ்க்கையின் இருண்ட பக்கங்களைப் பகிர்ந்துக் கொள்ளும் இணக்கமான சூழல் உருவாகிறது.மிகவும் மெதுவாக செல்லும் இப்படம் சுவாரஸ்யமான உரையாடல்கள் மற்றும் இயல்பான நடிப்பால் மனதில் இடம் பிடிக்கிறது.


டோக்கியோ பியான்சி - ஜப்பான் - இயக்குனர் ஷெபான் லிபர்ஸ்க்கி


அமிலி என்ற இளம் பெண் ஜப்பானை நேசிக்கும் பிரெஞ்ச் பெண். ஜப்பானைப் பற்றிய கனவுடன் டோக்கியோ வரும் அவள் ஜப்பானியரான ஒரு காதலனையும் தேடிப்பிடிக்கிறாள். அவனுக்கு பிரெஞ்ச் டீச்சராகி காதலியாக மாறும் காட்சிகள் படத்தை நகர்த்துகின்றன ,நிர்வாணக் குளியல்கள், உடல் உறவு முனகல்களுடன் படம் பல இடங்களில் பிட்டு படம் போலத்தான் நகர்கிறது. ஆனால் ஜப்பான் காதலன் பிரான்சை நேசிப்பவனாக இருப்பது படததின் திருப்பம். டோரண்டோ திரைப்பட விழாவில் திரையிடப்பட்ட இந்தப் படம் சின்ன சின்ன புரிதல்கள், புரியாத உணர்வுகளுக்கு இடையே பார்வையா ளர்களை கவர்ந்தது. மாற்று கலாச்சார மோதல்களால் ஏற்படும் குழப்பங்களை காதலுடன் சொன்ன படம் இது.

இன் ஹர் பிளேஸ் -கொரியா - இயக்குனர் ஆல்பர்ட் ஷின்

ஒரு வயதான பெண்ணும் அவள் பதின்பருவ இளம் மகளும் குளிர் பிரதேசத்தில் வசிக்கிறார்கள். பண்ணை வீட்டில் உள்ள அவர்களை சந்திக்க வருகிறாள் மற்றொரு இளம் பெண். அந்த சிறுமி இப்போது கர்ப்பமாக இருக்கிறாள். அவள் பெற்றெடுக்க உள்ள தனது கணவரின் செயற்கை முறை கருத்தரிப்பு குழந்தையை கொண்டு செல்ல வந்திருக்கிறாள் இந்தப் பெண்.மூன்று பெண்களுக்கும் இடையில் ஏற்படும் உணர்ச்சிகரமான மாற்றங்களும் தடுமாற்றங்களும் தான் படம். சிறந்த திரைக்கதையைக் கொண்ட படம் இது.

பனாமா -செர்பியா  ( இயக்குனர் பாவலே விக்கோவிக் )
மாஜா என்ற இளம் பெண்ணுடன் பழகுகிறான் ஜோவன். இருவரும் எந்தக் கட்டுப்பாடும் இன்றி உடலுறவு கொள்கிறார்கள், எந்த நிபந்தனையும் இன்றி காதலிக்கிறார்கள். ஆனால் மாஜாவின் மர்மமான செயல்பாடுகள், ரகசியமாக அவள் செல்போனில் பேசுவது, திடீரென மாயமாவது போன்றவை அவனுக்குள் சந்தேகத்தீயை வளர்க்கின்றன. நிபந்தனையற்ற பாலியல் உறவு பொசசிவ்னஸ் கொண்ட காதலாக மாறுகிறது. அவள் செல்போனை அவன் வேவு பார்ப்பதும், ரகசியமாக பனாமா தீவு வரை பின் தொடர்ந்து செல்வதும் படத்தின் இதர பகுதிகள். பொய்களும் பொறாமையும் உணர்ச்சிகரமான உடல் உறவுகளுமாக ஜோவன் காதலில் தன்னை இழக்கிறான். கடைசியில் அவன் மாஜா யார் என கண்டுபிடிக்கிறான். தற்போதைய இளம் தலைமுறையினரின்  ஜஸ்ட் லைக் தட் உறவுகளையும் உறவுகளின் போலித்தன்மைகளையும் காதலின் வலியையும் பொறாமையால் காதலர்கள் இடையே எரியும் பிரிவுத்தீயையும் விவரிக்கிறது. மிகச்சிறந்த படமாக இது மனதுக்குள் நிலைக்கிறது. அழகான அந்த கதாநாயகிக்காக படத்தைப் பார்த்துக் கொண்டே இருக்கலாம் போலிருக்கிறது.


DORA AND SEXUAL NEUROSIS OF OUR PARENTS
மனநலம் பாதிக்கப்பட்ட இளம் பெண் ஒருத்தி பாலியல் உணர்வுகளை பெறுவதால் ஏற்படும் விளைவுகளை சொல்லும் படம். பிடித்தவர்களுடன் உறவு வைப்பது பற்றிய தந்தை-தாயின் விளக்கத்தை தப்பாக புரிந்துக் கொள்ளும் அவள் தந்தையிடம் உனக்கு என்னைப் பிடிக்குமா எனக்கேட்டு அவரையே முத்தமிட முயற்சிக்கும் போது மனம் அதிர்கிறது. .பின்னர் தந்தை தாயின் உடலுறவை நேரில் பார்த்து தமக்கும் அதுபோல உறவு வேண்டும் என்று அவள் ஓர் ஆணைத் தேடுகிறாள். எவனோ தெருவில் போறவன் பின்னால் போய் அவனால் பலாத்காரம் செய்யப்படுகிறாள். மீண்டும் மீண்டும் அவனை நாடிப்போய் கர்ப்பம் அடைகிறாள். அவனோ அவளை திருமணம் செய்ய மறுக்கிறான். உன்மகளை நான் அனுபவிக்கிறேன் அவ்வளவுதான் என்று அவள் தந்தையை விரட்டியடிக்கிறான். மிகவும் சிக்கலான பிரச்சினையை மிகுந்த கவனத்துடனும் மாற்றுத்திறனாளிகளின் பரிதாபகரமான உலகத்தையும் சித்தரிப்பதில் இப்படம் ஒரு முக்கிய இடம் பெறுகிறது.



சென்னை சர்வதேச திரைப்பட விழா நிறைவு

 


சென்னை 13 வது சர்வதேச திரைப்பட விழா ஜனவரி 6ம் தேதி தொடங்கி 13ம் தேதி நிறைவு பெற்றது. இதில் சிறந்த தமிழ்ப்படத்திற்காக போட்டியிட்ட 12 படங்களில் நடுவர் பரிசை ரேடியோ பெட்டி என்ற படத்திற்காக அதன் இயக்குனர் ஹரி விஸ்வநாத்தும் அந்தப் படத்தில் வயதான பாட்டு ரசிகராக வந்த டி.வி,வி. ராமானுஜமும் விருது பெற்றனர்.

சிறந்த தமிழ்ப்படமாக கிருமி தேர்வு செய்யப்பட்டது. படத்தின் இயக்குனர் அனுசரண் விருதைப் பெற்றுக்கொண்டு பேசும் போது போலீஸ்காரர்களும் சில நேரங்களில் கிரிமினலாக மாறுவதை விவரித்து குற்றவாளிகளும் காவலர்களும் சந்திக்கும் ஒரு மையப்புள்ளியை படம் விவரிப்பதாக தெரிவித்தார்

சிறந்த நடிகராக தனி ஒருவன் படத்தில் தனித்து தெரிந்த நடிகர் அரவிந்த்சாமி விருது பெற்றார். சிறந்த நடிகை நயனதாரா விருதைப் பெற வந்தபோது கேமராக்கள் அவருக்குள்ள நட்சத்திர அந்தஸ்த்தை படம் எடுத்துக்காட்டின.

நடிகைகள் சுகாசினி, பூர்ணிமா பாக்யராஜ், நடுவராக பணியாற்றிய லிசி நடிகரான இயக்குனர்கள் மனோாலா, சித்ரா லட்சுமணன், மன்சூர் அலிகான் போன்ற ஏராளமானோர் நிறைவு விழாவில் பங்கேற்று சிறப்பித்தனர். மிகச்சிறப்பாக சர்வதேச திரைப்பட விழாவை ஏற்பாடு செய்து சென்னை மக்களின் வெள்ளத்துயரை கலையின்பால் ஆற்றுப்படுத்திய அனைவரும் பாராட்டுக்குரியவர்கள்

செந்தூரம் ஜெகதீஷ்